T
fjkm logo white-bg black-bg
Fidirana
Mofon'aina

31-03-2024

Mar 16: 1 - 8

 Mofon'aina Alahady 31-03-2024

mar 16: 1 - 8

Alahady 31 Martsa 2024

Marka 16. 1-8

PASKA
Manorina ny fanekeny ny Tompo
1. Aoka hifandinika izay ahitana ny Tompo
Raha ny marina dia tsy i Jesoa velona no antony nandehanan’ ireto vehivavy ireto tany amin’ny fasana. Ny nahatonga izany dia ny fanadinoana ny Tenin’i Jesoa. Isika miaina izao Paska izao kosa dia tian’ny Tompo tsy ho tahaka ireo vehivavy ireo. Tsy ny hanokatra ny fasana no hifandinihina fa izay ahitana ny Tompo nandresy ny fahafatesana.

2. Aoka re tsy hiditra anaty fasana
Rehefa hitan’izy ireo fa nisokatra ny fasana dia niditra tao izy ireo. Ny fasana dia toerana nandevenan’i Jesoa ny fahotantsika ka aza midikiditra ao intsony. Ary aza talanjona isika rehefa nahita Azy nitsangana fa tena izany mihitsy no asa nampanaovina Azy sy antom-piaviany

3. Mandehana fa mialoha antsika Izy:
Amin’izay iraka ampanaoviny antsika dia tsarovy fa manomboka ny andro Paska dia manamafy fa mialoha antsika amin’izay ataontsika Izy. Ary tsy izany ihany fa manala ny tahotra, tahaka izay nahazo ny mpianatra satria nihevitra ireo fa maty ny Tompo

Fanontaniana:
Inona avy ny dinika tokony hifanaovana amin ‘izao andro Paska izao?
Sampana Sekoly Alahady Foibe

1. Ary rehefa afaka ny andro Sabata, dia lasa nividy zava-manitra Maria Magdalena sy Salome ary Maria, renin'i Jakoba, mba handeha hanosotra ny fatin'i Jesoa.

2. Ary nony maraina koa tamin'ny voalohan'andro amin'ny herinandro, rehefa niposaka ny masoandro, dia nankany amin'ny fasana izy ireo.

3. Ary niresaka hoe izy: Iza re no hanakodia ny vato ho afaka amin'ny varavaram-pasana hisolo antsika?

4. Fa nony nitraka izy, dia, indro, hitany fa efa voakodia niala ny vato; fa lehibe dia lehibe ny vato.

5. Ary raha niditra tao anatin'ny fasana izy, dia nahita zatovo anankiray nipetraka teo amin'ny ankavanana niakanjo akanjo fotsy, dia talanjona izy.

6. Fa hoy ilay zatovo taminy: Aza talanjona; mitady an'i Jesoa avy any Nazareta, Izay nohomboana tamin'ny hazo fijaliana, ianareo; efa nitsangana Izy; tsy ato Izy; jereo fa teo no nametrahany Azy.

7. Fa mandehana, lazao amin'ny mpianany sy Petera fa mialoha anareo ho any Galilia Izy; any no hahitanareo Azy, araka izay nolazainy taminareo.

8. Dia nivoaka izy ka lasa nandositra niala tamin'ny fasana, fa tora-kovitra sady talanjona izy; ary tsy mba nilaza na inona na inona tamin'olona izy, satria natahotra.

30-03-2024

2 kor 13: 1 - 4

 Mofon'aina Sabotsy 30-03-2024

2 kor 13: 1 - 4


1. Izao no fanintelon'ny hankanesako atỳ aminareo. Amin'ny tenin'ny vavolombelona roa na telo no hanorenana mafy ny teny rehetra (Deo. 19. 15).

2. Efa nambarako fahiny, sady milaza rahateo koa aho - toy ny nataoko fony mbola teo aminareo fanindroany ihany, ary ankehitriny raha tsy eo kosa - amin'izay nanota teo aloha sy amin'ny sisa rehetra, fa rehefa tonga indray aho, dia tsy hiantra,

3. satria ianareo mitady famantarana fa miteny ato anatiko Kristy, Izay tsy malemy aminareo, fa mahery ao aminareo kosa.

4. Fa voahombo tamin'ny hazo fijaliana Izy noho ny fahalemena, nefa velona kosa noho ny herin'Andriamanitra. Fa izahay koa dia malemy ao aminy, nefa hiara-belona aminy ho anareo izahay noho ny herin'Andriamanitra.

29-03-2024

Mar 15: 16 - 28

 Mofon'aina Zoma 29-03-2024

mar 15: 16 - 28

Zoma 29 Martsa 2024

Marka 15. 16-28

Manorina ny fanekeny ny Tompo

Zavatra roa no natrehin’ny Tompo tamin’ity andro manjombona ity mba hitondrany hazavana ho antsika:

1. Ny miaramila:

Nataon’ireo miaramila ho fanalana hamohamo ny Tompo. Notafiany lamba volomparasy sy nosatrohany satro-tsilo ary noarahabainy hoe: « arahaba ry Mpanjakan’ny Jiosy ». Misy amintsika mahafantatra fa i Jesoa no Mpanjaka te hanjaka amin’ny fiainantsika saingy toa vazivaziantsika izany. Am-bava fotsiny no andraisantsika izany fa tsy latsa-paka anaty fo akory. Tsarovy fa niaritra ireo zavatra ireo Izy mba hahatanteraka ny famonjena antsika. Aza manao toy ireo miaramila manao tsinotsinona ny Mpanjakantsika fa ekeo Izy.

2. Ny hazo fijaliana :

Toe-javatra ratsy sy maha-menatra izany hoe mifantsika amin’ny hazo fijaliana. Izany anefa no tsy maintsy natao an’i Jesoa, nanampy trotraka izany ny kapoka sy ny fampijaliana natao Taminy. Tena tsy maintsy nolalovany izany satria raha tsy nandalo izany izy dia tsy ho tonga toeram-pamonjena izany hazo fijaliana izany. Aoka isika hankamamy izany hazo fijaliana izany satria teo no nanolorany ny Tenany ho famonjena antsika. Tonga toerana ahafahantsika mametraka ny fahotantsika izany. Tonga reharehantsika mihitsy aza. « Fa sanatria raha mba misy hataoko rehareha afa-tsy ny hazo fijalian’i Jesoa Kristy Tompontsika… » (Gal. 6.14)

Fanontaniana:

Inona no toe-javatra fantatrao mampiavaka ny Zoma Masina?

Sampana Sekoly Alahady Foibe

16. Ary ny miaramila nitondra an'i Jesoa ho eo an-kianja, dia ao anati-rova*, sady nanangona ny miaramila namany rehetra.

17. Ary dia nampitafy Azy lamba volomparasy izy, sady nandrandrana satroka tsilo, ka nasatrony ny lohany.

18. Ary dia niarahaba Azy hoe izy: Arahaba, ry Mpanjakan'ny Jiosy!

19. Ary dia nikapoka ny lohany tamin'ny volotara izy sady nandrora Azy, dia nandohalika sy niankohoka teo anatrehany.

20. Ary rehefa nanao Azy ho fihomehezana izy, dia nanala ilay lamba volomparasy teny aminy, ka nampitafiny Azy indray ny fitafiany; ary dia nentiny hohomboany amin'ny hazo fijaliana Izy.

21. Ary Simona Kyreniana (rain'i Aleksandro sy Rofosy) izay nandalo avy tany an-tsaha, no notereny hitondra ny hazo fijalian'i Jesoa.

22. Ary Jesoa dia nentiny teo amin'ny tany Golgota, izany hoe, raha adika, Fitoeran-karan-doha.

23. Dia notolorany divay miharo miora Izy; nefa tsy nety nisotro Izy.

24. Ary rehefa voahombony tamin'ny hazo fijaliana Izy, dia nanaovany loka no fizara ny fitafiany, hahitany izay ho azony avy.

25. Ary tamin'ny ora fahatelo no nanomboany tamin'ny hazo fijaliana.

26. Ary ny soratra milaza ny nanamelohana Azy dia voasoratra teo amboniny hoe: MPANJAKAN'NY JIOSY.

27. Ary nisy jiolahy roa nohomboany tamin'ny hazo fijaliana koa, ny anankiray teo amin'ny ankavanany, ary ny anankiray teo amin'ny ankaviany.

28. *

28-03-2024

Mar 14: 22 - 25

 Mofon'aina Alakamisy 28-03-2024

mar 14: 22 - 25

Alakamisy 28 Martsa 2024

Marka 14. 22-25

Manorina ny fanekeny ny Tompo

Amin’izao Alakamisy Masina izao dia mampahatsiaro antsika indray fa i Jesoa dia manao fanekena vaovao amintsika. Ny Fanekem-pihavanana vaovao izay nataony dia famonjena sy fanavotana antsika amin’ny fahotana mba ho vita fihavanana amin’ Andriamanitra isika. Lehibe ny fitiavany antsika mpanota ka:

1. Manolotra ny tenany Izy:

Ny tenan’llay zanak Andriamanitra tsy nanan-tsiny sy feno fahamasinana no nanaiky hitondra ny fahotantsika ka nijaly nohombohana tamin’ny hazo fijaliana. Tsaroantsika ve fa tsy mba trano nipetrahan’olona no nahaterahany fa trano nitoeran’ny biby? Fanomanana sahady ireny fa tsy ny biby intsony no natao fanatitra noho ny otantsika fa ny Tenany. Fitiavany lalina loatra izany ka tsara fandinika amin’izao andro anio izao. « Tsy misy manana fitiavana lehibe noho izao, dia ny manolotra ny ainy hamonjy ny sakaizany. » (Jao. 15.13)

2. Manolotra ny rany Izy:

Nalatsany ho antsika ny rany, mba hitondra famelan-keloka sy famonjena ho antsika, hahatonga antsika ho vita fihavanana amin’Andriamanitra. Ny hazo fijaliana no toerana nandatsahany izany rany izany. Koa izay rehetra mibebaka ka miala amin’ny ratsy fanaony ary miverina na mitodi-doha amin’Andriamanitra amin’ny alalan’ny finoana an’i Jesoa Kristy dia tonga voavela heloka ka ho tonga zanak Andriamanitra noho izany rà nalatsany izany.

Fanontaniana:

Ahoana ary no ataontsika hisitrahantsika izany?

Sampana Sekoly Alahady Foibe

22. Ary raha mbola nihinana izy, Jesoa nandray mofo; ka nony efa nisaotra, dia novakiny ka natolony azy ary nataony hoe: Raiso, ity no tenako.

23. Dia nandray kapoaka Izy, ka nony efa nisaotra, dia natolony azy; ka dia nisotroan'izy rehetra izany.

24. Ary hoy Izy taminy: Ity no rako amin'ny fanekena*, izay alatsaka hamonjy ny maro.

25. Lazaiko aminareo marina tokoa: Tsy mba hisotro ny vokatry ny voaloboka intsony Aho mandre-pihavin'ny andro hisotroako izay vaovao any amin'ny fanjakan'Andriamanitra.

27-03-2024

Heb 10: 26 - 31

 Mofon'aina Alarobia 27-03-2024

heb 10: 26 - 31

Alarobia 27 Martsa 2024

Hebreo 10. 26-31

Jehovah HITSARA ANTSIKA

Raha miverina mamaky hatrany amin’ny and.19 isika dia mahita ny anatra sy antso ho antsika mba hanana faharetana amin’ny fihazonantsika ny finoana satria hantomotra ny andro

1. Aza miverina amin’ny fahotana intsony

Raha olona efa nandray an’i Kristy isika, nefa mbola miverina amin’ny fahotana, dia isika no ambara eto hoe minia manota. Ary dia ambara fa manitsaka an’i Jesoa (and.29). Tonga manao tsinontsinona ny fanoloran-tena izay nataony teo amin’ny hazo fijaliana, izay toerana mahamenatra tamin’izany, ho famonjena antsika. Manamavo ny famorjena sarobidy natolony. Amin’izany dia nataontsika ho zava-tsy mendrika ilay ran’i Kristy nanadiovany antsika. Ary tonga mpikomy amin’ny Fanahy Masina indrindra izay mitondra ny fahasovan’Andriamanitra ao am-pontsika. Fotoana izao handinihantsika tena. Mibebaha ankehitriny.

2. Aza atao tsinotsinona ny famonjeny

Rehefa natolotr’Andriamanitra ho antsika ny famonjena tamin’ny alalan’ny Zanany tiany indrindra, kanefa nolavintsika izany dia tonga fahatezerana eo anatrehany izany. Fahatezerana no miandry antsika amin’izany; satria raha miverina amin’ny fahotana isika dia manombo indray ny Zanany «...nihemotra, dia tsy azo havaozina indray ho amin’ny fibebahana, satria manombo ny Zanak’ Andriamanitra indray amin’ny hazo fijaliana ka manao Azy ho fahamenarana. » (Heb 6.6).

Fanotaniana:

Inona avy ireo karazana fihemorana tokony hotandremana?

Sampana Sekoly Alahady Foibe

26. Fa raha minia manota isika rehefa nahazo ny fahalalana tsara ny marina, dia tsy misy fanatitra noho ny ota intsony,

27. fa fiandrasana mahatahotra amin'ny fitsarana ary fahatezerana mirehitra izay handany ny fahavalo rehetra kosa.

28. Izay manohitra ny lalàn'i Mosesy dia maty amin'ny tenin'ny vavolombelona roa na telo ka tsy asiana famindram-po;

29. manao ahoana kosa ary no hamafin'ny fampijaliana ataonareo tokony hihatra amin'izay nanitsaka ny Zanak'Andriamanitra ka nanao ny ran'ny fanekena izay nanamasinana azy ho zavatra tsy masina sady naniratsira ny Fanahin'ny fahasoavana?

30. Fa fantatsika Izay nanao hoe: "Ahy ny famaliana; Izaho no hamaly;" ary koa: "Jehovah hitsara ny olony" (Deo. 32.35, 36).

31. Zavatra mahatahotra ny ho azon'ny tànan'Andriamanitra velona.
Attention
Bug Error
Nous faisons tout notre possible pour régler le problème au plus vite. Merci de votre patience
spin gif